Яңгыр яумый, сәбәбе нидә?
Яңгыр яумый җәмәгать! Аллаһы тәгалә безне корылык белән сыный. Инде бер айлап яңгыр яуганы юк. Бөтен җир корыды, кипте. Печән дә үсә алмады. Әмма печән юк дип аптырап тормады халык, әкрен генә җыя алган кеше җыйды. Аз булса да җыелды. Кырда икмәкләр үсә алмады. Бөтен икмәкне сенажга урып салалар. Кечкенә чишмәләр кибә. Сәбәбе нидә? Уйланып караганыгыз бармы? Барысы да үзебездән. Соңгы елларда бик иркен яшәдек. Бар әйбер бар, җәй көннәрен дә яңгыр вакытында ява иде. Әмма Аллаһы тәгалә безне бу дөняга сынар өчен, имтихан тотар өчен җибәргән. Ризыкның бәрәкәтен югалттык, шәһәр җирләрендә чүп савытлары янында икмәк кисәкләрен күреп җан әрни иде. Менә шуңа да Аллаһы тәгалә безне икмәкнең кадерен белә башламаслар микән дип корылык белән сыный. Бу имтиханны ничек тотарбыз. "Без булдырабыз" дип кенә булмый икән шул, Аллаһы тәгалә бирмәсә. Гонаһларыбыз бик күп. "Җир йөзендә хайваннар, кош-кортлар булмаса, адәмнәрнең гонаһлары күплеккә, бер тамчы да яңгыр яудырмас идем" дигән Аллаһы тәгалә. Менә шул, азрак уйланырга, туры юлга басарга кирәк. Күбрәк Аллаһ кушканнарны эшләп, тыелганнарыннан тыелырга кирәк.
Добавил: Марат (12.07.2010) |
Просмотров: 1890
|
Вход на сайт