Ачасыр авылы мәчете елдан-ел төзекләнә, тирә-күрше авыллар арасында үзенең иң төзек, матур булуы белән аерылып тора. Чөнки мәчетне караучы, аның төзеклеген кайгыртып торучы картлар булганда безнең мәчетебез гел шулай төзек торыр, Алла боерса. Шушы мәчетне төзек хәлдә тотуда мәтәвәллият әгъзаларының роле зур.

Олы Ачасыр авылы Яшел үзән районында иң зур авылларның берсе булып тора. авыл гомер-гомергә үзенең динлелеге, дини кешеләрнең күп булуы белән аерылып торган. электән үк авылыбызда ике мәхәллә, мәдрәсә булуы билгеле. Бу мәдәрәсәләрдә безнең танылган имамнарыбыз, хәзрәтләребез дин сабакларын өйрәткән. кыскасы, авылыбыз халкы үз иманын гомергә саклап килгән. Хәтта чукындыру заманнарында да авылга килгән чукындыручыларны халык кыйнап авылдан куып чыгарган.